呢排疫情關係，好多人都會減少喺街外進食。以往返工前坐喺茶記或快餐店，食件蛋治飲杯奶茶先返工嘅日子，或者要停一停喇。如果唔夠時間喺屋企煮加食埋個早餐先出門口嘅話，快快手喺麵包店買個包都可以。除咗各大知名嘅連鎖集團麵包店外，各區都有唔少麵包小店呢。之前分別介紹過新界區同九龍區，今次一於講埋港島區啦︰
Bakehouse 灣仔
圖：麵包店Facebook
相信喺灣仔返工嘅朋友，唔多唔少都會聽過呢間麵包店，大排長龍嘅情況已經見怪不怪～皆因呢間麵包店嘅老闆Gregoire Michaud 係四季飯店嘅前任餅房行政總廚，佢來自瑞士，有25年麵包製作經驗。Bakehouse主打傳統手工製作嘅麵包，堅持自種酸種。全部產品都係每日新鮮製作，而且採用法國傳統麵粉製作麵包，用料講究，麵包又香又軟啦。其中牛角包同蛋撻更係人氣之選，牛角包勁鬆脆，層次感豐富，蛋撻外層酥脆，蛋餡滑嫩，想食嘅就記得預時間排隊啦！
Concept 品穀 灣仔
圖：ms.chung、caca_cheung
呢間品穀分店有別於其他，係一間烘焙概念店，90後嘅店主將無添加麵包、法式甜品同港式茶飲三樣嘢集於一店。佢哋選用法國入口嘅麵粉同牛油，麵糰加入發酵嘅天然酸種，令麵包散發陣陣麥香，而且健康。人氣大熱嘅法式牛角包，外表金黃鬆脆，入面呈蜂巢狀，好有層次。另外更有創新嘅閃電酥，即係閃電泡芙同牛角包嘅remix版。咁多款揀，選擇困難症發作喇要！
Levain Bakery 中環
圖：麵包店Facebook
位於元創坊嘅Levain Bakery，開業超過十年，喺未流行酸種麵包嘅時候已經開始整天然酸種麵包，店內嘅麵包全部都用天然酵母製作，相比幾個鐘就發酵到嘅速發酵母，天然酵母要用起碼一日發酵。整出嚟嘅麵包表層香脆，內裡鬆軟，有種特別嘅果酸味，可能冇食開嘅人未必會習慣，但食多兩次就會自然愛上呢種健康又天然嘅傳統歐洲手工麵包。除咗酸種麵包，唔少食客都推薦丹麥酥，酥脆香口，不妨一試！
ABC餅屋 灣仔
圖：girl_eatdas， hkkongfoodie
由50年代「ABC愛皮西大飯店」演變到而家位於灣仔嘅ABC餅屋，已經經營接近70年，大家可以喺度搵到好多懷舊西餅同麵包。不得不提「真係菠蘿包」，今次真係菠蘿包有菠蘿啦，菠蘿皮鬆脆，配上滿滿嘅菠蘿粒同吉士內餡，口感獨特。而人氣蜂蜜卷蛋更令人不停回購，卷蛋蛋味十足，中間啲cream甜而不膩，好輕身，而且餡料有層次，有蕃薯、綠茶同朱古力海綿蛋糕喺入面，一次過畀你試晒幾個味道！餅店仲有大人細路都啱嘅山東合桃酥同自創減甜鳥結糖賣呢～
天天烘焙 西環
圖：麵包店Facebook
呢間係一間本土港式麵包店，麵包種類眾多，仲可以訂製蛋糕，無論係打印圖片嘅蛋糕定係立體蛋糕都有得訂，蛋糕同麵包日日新鮮製造。價錢平民，好多學生、打工仔朝早都會嚟買個包當早餐食。
