20年經驗意大利名廚主理！中環新開歌劇院風格意大利菜 嫩滑原隻燒春雞BB

喺香港意大利菜嘅選擇何其多，最近中環又新開一間喇。餐廳位於高樓大廈24樓，除咗可以睇室外靚景，室內設計亦走歌劇院風格，以折衷美學為特色，食客享受食物同時可以滿足埋視覺感受。

食物方面由擁有20年米芝蓮餐廳經驗嘅行政總廚Andrea Zamboni主理，大廚於意大利出世及長大，曾於意大利及亞洲工作，所以佢嘅食物除咗有傳統意大利風味，亦加入咗個人特色，而且佢特別注重食材，因為佢希望畀客人品嚐到唔同食材嘅真味。

原隻燒春雞 ($288)

大廚嘗試咗多款來自本地、日本及意大利等地嘅雞種，最終選用咗呢款自由放養、源自意大利嘅春雞BB，再以簡單嘅香草及胡椒作調味，咁先食得出雞本身天然味道同嫩滑嘅肉質。

龍蝦細闊麵伴皮埃蒙特熱沾醬 ($268)

首先講下麵有咩咁特別，自家製細闊麵每公斤麵粉用咗36隻蛋黃，口感順滑之餘蛋味仲好香濃。醬汁係Zarda醬汁(香辣大蒜番茄醬汁)，因為呢款汁味道較濃郁，所以配上以鯷魚和大蒜製作而成嘅Bagna-cauda Fondue (皮埃蒙特熱沾醬)平衡菜式返菜式整體味道。

烤羊架配嫩炒燈籠椒翠玉瓜 ($468)

選用科羅拉多的羊架，比起普通羊架，呢款經烤製後會多咗一份油香，味道更濃郁及更有層次。另外，大廚特意添加咗以蘑菇、可可及咖啡製作而成嘅碎粉，可以減輕羊架騷味，平時唔太食羊嘅朋友都易接受啲。

傳統卡邦尼長通粉 ($168)

卡邦尼意粉大家都唔陌生，但正宗食法就唔係周圍有得食～呢度就跟返最傳統製法，簡單用意大利麵、雞蛋及風乾豬面頰肉製作而成。

牛肝菌蘑菇黑松露闊條麵 ($228)

大廚另一道招牌意粉！一樣係用自家製闊條麵，但製作麵條時已經加咗自家製牛肝菌粉，醬汁方面以野生蘑菇及牛肝菌製作而成，最後加埋來自塔斯馬尼亞嘅黑松露及香芹，黑松露味又幾突出。

吞拿魚薄片、西西里檸檬、布朗特開心果、冰菜 ($188)

以地中海藍旗吞拿魚薄片配上西西里檸檬製作而成的醬，另外以產於北非嘅冰菜增加口感，係一道唔錯嘅開胃菜。